@Shahdan_shosh kundividas ĉi tiun foton de 11 junuloj arestitaj pro kundividita Sahur — manĝo antaŭ sunleviĝo por prepari sin fasti la sekvan tagon dum la islama monato de ramadano. (Fonto: Tvitero)

Unu jaro pasis post kiam la egipta eks-prezidanto Mohamed Morsi estis forpelita, kaj la nova reĝimo jam ricevis multe da kritikoj [angle] pro sia malrespekto de homaj rajtoj, ĉefe pro arbitra arestado.

Pli konkrete, nova leĝo pri kunveno en Egiptujo [angle] kaŭzis koleron inter egiptoj. Multaj el ili provis kontraŭi la leĝon [angle] sed estis arestitaj. Inter ili estas ankaŭ kelkaj aktivuloj kiel Alaa Abd El Fattah [angle], kiun oni lastjare kondamnis al 15 jaroj da malliberigo pro lia senpermesa organizado de protesto.

Iun tagon frue en la monato de ramadano, la sankta monato de fasto por la islamanoj, polico abrupte atakis domon, kie grupo de 11 junuloj havis festenon por Sahur (antaŭfasta manĝo antaŭ sunleviĝo dum fastado), ŝajne pro ilia malobeo al la leĝo pri kunveno. Retumantoj komencis pepi je la krad-etikedo #معتقلي_السحور [arabe], kiu signifas “arestitoj de Sahur.”

Ahmad Abd Allah skribis en sia Fejsbuk-paĝo jene [arabe]:

١١ واحد بيتسحروا في بيت واحد منهم في دمنهور … الداخلية قبضت عليهم بتهمة التظاهر من غير تصريح … الحرية لمعتقلي السحور

11 homoj havis antaŭfastan manĝon en la domo de unu el ili. La Ministerio pri Internaj Aferoj arestis ilin pro ilia kontraŭleĝa kunveno… liberigu la arestitojn de Sahur.

Mohamed Hazem, uzanto de Tvitero, pepis el Damanhur subtenante siajn amikojn:

مش عارف ابكي علي مجزرة الحرس الجمهوري ولا ابكي علي اصحابي 11 المعتقلين حسبي الله ونعم الوكيل #معتقلي_السحور

— Mohamed Hazem (@HazeemZZ) July 5, 2014

Mi ne scias, ĉu mi kriu pro masakro farita de la respublika defendotrupo, aŭ pro miaj 11 amikoj arestitaj.

Li sarkasme pepis poste:

ياتري ياوكيل النيابة هتعمل الاحراز جبنة رومي وزتون ولا هتخليها مولوتوف #كل_هدفهم_انهم_يصوموا #معتقلي_السحور :(

— Mohamed Hazem (@HazeemZZ) July 5, 2014

Ĉu la prokuroro rigardos fromaĝon kaj olivon kiel atestojn de la kontraŭleĝa ago, aŭ insistos, ke ili estas benzinboteloj?

Kaj Shahdan tvitere aperigis foton de la 11 arestitoj kaj skribis:

التهمة سحور جماعي حيازة فول وفلافل وزبادي #معتقلي_السحور pic.twitter.com/2cbVqvTsrl

— Shahdan (@Shahdan_shosh) July 5, 2014

Ilia krimo: Sahur en grupo. Ili estis arestitaj kun foul (faboj), kikerbuloj kaj jogurto enmane.

Aktivulo Wael Abbas pepis al siaj 265 000 sekvantoj:

انا غالبا هالغي حفل الفطار السنوي اللي باعمله كل سنة في بيتي احتراما لقانون التظاهر الجديد :) #قبضوا_عليهم_وهم_بيتسحروا #دمنهور

— Wael Abbas (@waelabbas) July 4, 2014

Mi probable nuligos mian ĉiujaran festenon por Iftar [postfasta manĝo post sunsubiro dum ramadano] por respekti la novan leĝon pri protesto :)

Li aldonis:

اصلا نص اللي كانوا عندي في الفطار السنة اللي فاتت يا محبوسين يا هربانين يا مطاردين :)

— Wael Abbas (@waelabbas) July 4, 2014

Ĉiuokaze duono el ili, kiujn mi lastjare invitis al postfasta manĝo, nun estas aŭ en malliberejo, aŭ en ekzilo, aŭ en fuĝado :)

Pasintjare la reĝimo de Morsi intencis trudi similan leĝon, kiu malpermesis kunvenon. Sed la leĝo ne ekvalidis pro forta protesto de internaciaj organizoj. La egipta blogo “WIKI THAWRA” [arabe], kiun administras la Egipta Centro pri Ekonomiaj kaj Sociaj Rajtoj, asertis, ke almenaŭ 80 homoj mortis en malliberejo dum la pasinta jaro, kaj ke pli ol 40 000 homoj estis arestitaj aŭ akuzitaj inter julio 2013 (fino de la registaro de Morsi) kaj meze de majo 2014.