See all those languages up there? We translate Global Voices stories to make the world's citizen media available to everyone.

Ĉu finiĝis la “Paca konstitucio” de Japanio?

[La originalo de ĉi tiu artikolo aperis en la 18a de septembro 2015 GMT.]

Interbatiĝo ekestis en la komitatkunsido de la japana parlamentejo

Interbatiĝo ekestis en la komitatkunsido de la japana parlamentejo. Ekrankopio el la oficiala kanalo de ANN en Jutubo.

Frue en aŭgusto 2015 la Ĉambro de Deputitoj de Japanio aprobis la leĝproponojn pri nacia sekureco, kaj la 19an de septembro ankaŭ la Ĉambro de Konsilantoj aprobis ĝin.

Kaoso regis en la japana parlamentejo preskaŭ la tutan semajnon de la 14a de septembro tial, ke la koalicia registaro de la ĉefministro Shinzo Abe [Ŝinzo Abe] komencis procedon por leĝigi la pridisputatajn proponojn, kiuj permesus al Japanio militi.

Abe jam eldiris, ke li volas vidi la leĝproponojn aprobitaj de la Ĉambro de Konsilantoj, nome la Supera Ĉambro de la du-ĉambra japana parlamento, plej malfrue en la vespero de vendredo, la 18a de septembro.

Opoziciaj partioj klopodis por malsukcesigi la planojn de la regantaj partioj, kaj ilin kuraĝigis dekoj da miloj da manifestaciantoj sur la stratoj tuj apud la parlamentejo en la centro de Tokio.

【Nova】La leĝproponoj pri nacia sekureco baldaŭ aprobiĝos. Regantaj partioj kaj opoziciaj partioj arde interbatalas, dum homoj manifestacias antaŭ la japana parlamentejo.

Milito kaj paco

Se aprobita, la leĝaro pri nacia sekureco disvastigos la rolon de la japana defendkorpuso mondskale, kaj permesos al Japanio apliki sian rajton pri kolektiva memdefendo kaj partopreni en militaj operacioj kun aliaj landoj kiel Usono.

Estas homoj, kiuj opinias, ke la proponita leĝaro povas esti kontraŭkonstitucia en la strikta senco kaj malakordas kun Artikolo 9 de la japana “Paca Konstitucio” proklamita post la dua mondmilito.

La registaro komencis la procedon por leĝigi la proponojn en merkredo, la 16a de septembro. Komence, kunsido de la speciala komitato de la Supera Ĉambro ne povis komenciĝi pro tio, ke protestantaj parlamentanoj blokis la pordojn kiel vi vidas jene:

Inter la parlamentanoj blokantaj la vojon al la komitatkunsida halo estis multaj virinoj portantaj ĉekape rozkoloran bandon, kiu legiĝis “Grupo de virinaj parlamentanoj kolerantaj.” Ili kriis “Ne tuŝu min! Ĉesigu seksmolestadon!” por malhelpi la komitatestron aliri al la komitatkunsidejo.

Ne ĉiuj tviteranoj estis simpatiaj:

Laŭ la ĵurnalo Sankei:【streĉiteco pri la leĝproponoj】Minacoj per seksmolestaj akuzoj malhelpadas la komitatestron Konoike [Kounoike] eniri en la komitatkunsidejon. Ankaŭ komitatano Ishii [Iŝii], iama basbala ludanto de la teamo Kintetsu [Kintecu], ŝajne suferis falsan akuzon.

… Ĉi tiuj kompatindaj rozkolor-bandulinoj ne scias la signifon de seksmolestado nek diferencon inter seksa ĝenado en laborejo kaj korpopalpado en homplena trajno!

Parlamentanoj interbatiĝas

Finfine parlamentanoj de la regantaj partioj elpensis ruzan planon por aprobi la reĝproponojn en la komitato: ili subite malfermis la estrarkunsidon en la komitatkusidejo, por ke ili seninterrompe komencu tie la komitatkunsidon. Trovinte sin trompitaj, parlamentanoj de opoziciaj partioj rapidis al la komitatestro, kaj rezultis bataleto en la kunsidejo.

Opoziciaj partioj provis ĉiujn laŭregulajn taktikojn por prokrasti la komitatan voĉdonon necesan por leĝigi la proponojn. Ili eĉ proponis la malkonfidon kontraŭ la komitatestro Konoike Yoshitada [Yoŝitada], sed vane.

【Frontpaĝo de la papera eldono】Denove okazis perforta aprobo. Leĝproponoj pri nacia sekureco estis aprobitaj en la komitatkunsido de la Ĉambro de Konsilantoj. Opoziciaj partioj proponos malkonfidon kontraŭ la kabineto. Aŭdinte la popolan voĉon kontraŭ la leĝproponoj, opoziciaj partioj diras “Ni ne povas retiriĝi.” Por pliaj detaloj legu en la hodiaŭa (en la 18a de septembro) matena eldono de la ĵurnalo Tokyo [Tokio].

“Japanio proklamis adiaŭon al demokratio”

La viro kun lipharoj en la dekstro de la bildo speciale kaŭzos intereson al multaj japanoj. Li estas eksa kolonelo Masahisa Sato kaj nun sidas en la Ĉambro de Konsilantoj kiel membro de la registara partio. Sato gvidis la japanan defendkorpuson en Irako por helpi rekonstruadon de la lando en januaro kaj februaro 2004. Tio estis la unua eksterlanda dislokado de japana armeo post la dua mondmilito.

Antaŭ la kverelo, Sato uzis Tviteron por plendi pri la laborkondiĉo en la japana parlamentejo:

Ekde la vespero daŭre ni estas enfermitaj en la estrarĉambro kaj ne povas aliri al la komitatkunsidejo. Eĉ por iri al necesejo, ni devas peti permeson de la blokantaj parlamentanoj de opoziciaj partioj.

Ne ĉiuj kompatis Sato nek aliajn parlamentanojn, kiuj suferis ĝenadojn de opoziciaj partioj:

Vi devas scii, Sato Masahisa, ke ĉion kaŭzis via kontraŭkonstitucia ago.

Intertempe, postenigo de multaj policanoj baris la protestantojn for de la parlamentejo en la centro de Tokio.

Al la senperfortaj manifestacioj la registaro, tamen, reagis per la subpremo nenormala kaj freneza. La mondo vidos en ĝi la proklamon: “Japanio adiaŭis demokration.

Komenci konversacion

Aŭtoroj, Ensaluti »

Gvidlinioj

  • Ĉiuj komentoj estas kontrolitaj de administranto. Ne sendu vian komenton pli ol unufoje ĉar tiu povus esti markita kiel spamo.
  • Bv. respekti al la aliaj. Komentoj kiuj enhavas malamajn esprimojn, obscenaĵojn kaj personajn atakojn ne estos aprobitaj.