Kato en la katvilaĝo Houtung en Tajpeo, la 8-an de januaro 2024. Foto: Kyle Lam/HKFP.

Tiu ĉi fotorakonto estis verkita de Kyle Lam kaj originale publikigita en Hong Kong Free Press (HKFP) la 27-an de aprilo 2024. Redaktita versio estas publikigita sube kiel parto de interkonsento kun HKFP pri kundivido de enhavo.

Iam floranta karbomineja urbo de Tajvano reinventiĝis kiel turisma celo kaj hejmo por pli ol 100 felisaj loĝantoj.

Houtong, en Ruifang — okcidente de la ĉefurbo Tajpeo — estis origine nomata “simia kaverno”. Dum la 20-a jarcento, la areo staris je la pinto de la tajvana karboproduktado, kun 220 000 tunoj ekstraktitaj de la tero ĉiujare. Ĝi spronis la kreskon de la loĝantaro, kiu atingis ĉirkaŭ 6 000 loĝantojn.

Turistoj faras fotojn kun kato en la katvilaĝo Houtung en Tajpeo, la 8-an de januaro 2024. Foto: Kyle Lam/HKFP. Uzata kun permeso.

Sed kiel en multaj minejaj urboj, junuloj elmigris ĉar industrio ŝrumpis en la jaroj 1990 kaj malpli ol 100 loĝantoj restis, pro tio ke la labormerkato malgrandiĝis.

Tio okazis ĝis 2008, kiam loĝanto kaj fotografisto Peggy Chien komencis akcepti forlasitajn katojn. Ŝi montris siajn strebojn en Flickr kaj gajnis la admiron de katamantoj tra la insulo, laŭ la ŝtata gazeto Taiwan Today. La enveno de pli da felisaj amikoj helpis rejunigi la kadukiĝantan vilaĝon kaj igis ĝin paradizo de katamantoj.

Katoj en la katvilaĝo Houtung en Tajpeo, la 8-an de januaro 2024. Foto: Kyle Lam/HKFP. Uzata kun permeso.

Hodiaŭ, la vilaĝo estas turista magneto kaj hejmo de kafejoj kun kata temo, vendejoj de produktoj por katoj, disfalantaj restaĵoj de la industria pasinteco de la vilaĝo kaj lokoj por malstreĉiĝo.

Katoj povas esti renkontataj bonvenigantaj vizitantojn de Tajpeo sur la fervoja ponto, kuŝantaj sur bretoj kaj ŝtupoj, aŭ dormantaj sur tegmentoj, benkoj aŭ ĉe anguloj.

Houtong estis listigita en la artikolo de CNN “Kvin lokoj en kiuj katoj eklipsas turismajn celojn” en 2013.

Turisto manĝigas katon en la katvilaĝo Houtung en Tajpeo, la 8-an de januaro 2024. Foto: Kyle Lam/HKFP. Foto uzata kun permeso.