La germana polico malpermesis porpalestinan konferencon en Berlino, pro la risko ke unu el la invititaj prelegantoj eldirus antisemitaĵon aŭ instigus al perforto. Ekrankopio el videaĵo de New York Times. Justa uzo.

Ĉi tiu artikolo estis originale publikigita en The New Arab la 16-an de aprilo 2024. Verkis ĝin Dima Hamdan, palestina ĵurnalisto loĝanta en Berlino. Ŝi estas la direktoro de la Reto de Ĵurnalistoj Marie Colvin. La artikolo estas republikigita en Global Voices kiel parto de interkonsento pri kunhavigo de enhavo.

Supozeble devis temi pri tritaga grava evento, en kiu lokaj aktivuloj kaj eminentuloj subtenantaj justicon por Palestino (de Ghassan Abu Sitta al Yanis Varoufakis kaj Noura Erekat) kuniĝus en defia demonstracio de forto. Eŭropskala kolektivo de pli ol 54  grupoj kaj organizoj kiuj volas krei komunan movadon, por postuli konton de Israelo pro la milito en Gazao kaj de Germanio pro sia kompliceco en tiu milito.

Sed ĉiuj ĉeestontoj de la evento antaŭsentis, ke la palestina kongreso povus tute ne okazi.

Ĉar la reago de la germana ŝtato estis antaŭvidita, kun centoj da policanoj deplojitaj por fermi la kongresejon lastvendrede, la ĉeestontoj reagis nur per stoikismo kaj disdegno.

“Kiel palestinano loĝanta dum multaj jaroj en Germanio kaj kies domo estis enrompita multajn fojojn de la polico, mi tute ne estis surprizita” diris Salah Seed de la organizo Palestinians and Allies. “Tio estas malespera provo de la registaro malpermesi ĉian solidarecon kun Palestino, sed ni ne silentos.”

Germanio estas nerva, kaj kun jura teamo kiu starigas argumentaron por ĝia defendo en la proceso ekigita de Nikaragvo, kiu antaŭ la Internacia Kortumo akuzas ĝin pri kompliceco en la militkrimoj faritaj de Israelo en Gazao, la germana ŝtato ne povis toleri kolektiĝon de siaj plej ardaj kritikantoj en la koro de sia ĉefurbo.

Al Ghassan Abu Sitta, renoma brita-palestina kirurgo kaj la nuna rektoro de la Universitato de Glasgovo, estis rifuzita la eniro en Germanion kaj oni malpermesis al li prelegi dum la kongreso eĉ per videokonferenco. Abu Sitta estas ŝlosila okulatestanto de la militkrimoj de Israelo en Gazao, kie li pasigis la monatojn de oktobro kaj novembro provizante medicinan helpon.

Invited to address a conference in Berlin about my work in Gaza hospitals during the present conflict.
The German government has forcibly prevented me from entering the country
Silencing a witness to genocide before the ICJ adds to Germany's complicity in the ongoing massacre.

— Ghassan Abu Sitta (@GhassanAbuSitt1) April 12, 2024

Mi estis invitita prelegi dum kongreso en Berlino pri mia laboro en la gazaaj malsanulejoj dum la nuna konflikto. La germana registaro perforte malebligis, ke mi eniru la landon. Silentigi iun kiu estas atestanto de genocido antaŭ la Internacia Kortumo aldonas al la kompliceco de Germanio en la nuna masakro.

La premo sur unu el la organizantoj, Jewish Voices, kreskis multe antaŭ ol okazis la evento. Ilia bankokonto estis fermita en marto, kio devigis ilin serĉi aliajn manierojn kolekti la monon necesan por okazigi la eventon. Ŝlosilaj politikistoj, inkluzive de Dirk Stettner, la estro de la parlamenta grupo de la Kristandemokrata Partio (CDU), postulis ke la registaro faru ĉion eblan por malpermesi la kunsidon.

Dum gazetara konferenco la 12-an de aprilo, Wieland Hoban, prezidanto de Jewish Voices, estis videble elĉerpita. La ĵurnalistaro estis klare dividita inter germanaj kaj ne-germanaj ĵurnalistoj. La unua grupo pafis kutimajn demandojn: Ĉu vi apogas Hamason? Ĉu vi agnoskas la ekzistorajton de Israelo? Ĉu vi estas antisemito? Li estis malpezigita kiam dana ĵurnalisto demandis lin, kiel li sentis sin kiel judo akuzata pri antisemitismo.

“Estas aparte malkonvene, pro tio ke ni havas membrojn kies familioj estis persekutitaj de la nazioj”, li respondis. “La praidoj de tiuj, kiuj transvivis la holokaŭston, revenas al Germanio kaj renkontas homojn, kiuj asertas, ke por fronti la germanan kulpon pri la holokaŭsto, necesas kalumnii tiujn homojn. Se oni racie konsideras tion, do ĝi memklariĝas.”

Mortsonorado de la germana demokratio?

La enirbiletoj por la tre atendata evento elĉerpiĝis semajnojn antaŭe. Pli ol 800 homoj vicumis ekstere de la kongresejo, sed renkontis almenaŭ 200 policanojn, kiuj sciigis ilin, ke nur 250 homoj estos enlasitaj en la konstruaĵon, inkluzive de la organizantoj kaj presaro. La preteksto estis, ke la ejo estas tro malgranda por enhavi tiom da homoj. Fakte ĝi ja estis eta, sed la organizantoj diris, ke ili baraktis por trovi kongresejon kies posedanto estas sufiĉe kuraĝa por gastigi ilin.

Ene de la ejo ĵurnalistoj pacience atendis la enlason de la ĉeestantoj. Je la 14h30, tio estas je la horo kiam estis planita la komenco de la prelego, la salono estis ankoraŭ duone malplena kun homoj kriantaj deekstere por postuli, ke oni lasu ilin eniri. En la malantaŭa parto de la ĉambro, la polico blokis la aliron per ruĝa bendo. Poste, tra la malantaŭa pordo, alia grupo de ĵurnalistoj estis enlasita. Ili apartenis al la germanaj komunikiloj kaj ne troviĝis en la listo de ĵurnalistoj akredititaj de la organizantoj. La organizantoj ne invitis ilin, ĉar ili estis konsideritaj malamikaj al la evento, sed la polico decidis enlasi ilin (sen sciigi tion al la organizantoj), kaj ili estis enkalkulitaj en la 250 homoj permesataj en la ĉambro.

Malfrue en la posttagmezo oni permesis, ke la evento komenciĝu, sed kun duono de la seĝoj malplenaj.

“State repression is not new, it is the result of years of anti-Palestinian discourse being purported in German media and institutions. But now it has reached a new level of dehumanisation”

Inside Germany's far-reaching anti-Palestinian crackdown ⬇️https://t.co/xRL2CLbkue

— The New Arab (@The_NewArab) November 16, 2023

“La ŝtata subpremo ne estas nova, ĝi estas la rezulto de jaroj de kontraŭ-palestina diskurso en la germanaj komunikiloj kaj institucioj. Sed nun ĝi atingis novan nivelon de malhumaniĝo”.

La profunda kontraŭ-palestina subpremo en Germanio.

Heba Jamal, palestina ĵurnalisto kaj aktivulo, faris potencan deklaron pri sia sperto kun la polica subpremo en Germanio kaj pri la perdo de familianoj en Gazao. Sed, post malpli ol 30 sekundoj de aŭskultado de registrita deklaro de palestina historiisto Salman Abu Sitta, dekoj da policanoj sturmis la ĉambron kaj malŝaltis la elektron.

Dum pli ol unu horo, neniu komprenis, kio okazas. La polico diris al la organizantoj, ke la palestina aŭtoro Salman Abu Sitta ne estas permesata prelegi en Germanio, ĉar li estas “polemika” preleganto. Tiam ili postulis spekti la videaĵon por taksi, vorton post vorto, ĉu li diras ion ajn, kiu “gloras perforton” kontraŭ Israelo. Fine ili diris al la homamaso, ke la evento estas nuligita kaj ordonis, ke ĉiuj foriru.

La proparolanto de la germana polico, Anja Dierschke, asertis al RBB, ke ekzistis “videbla danĝero, ke ene de la tri venontaj tagoj, tiu evento kondukus al publika uzo de frazoj, kiuj gloras perforton, neas la holokaŭston aŭ estas antisemitaj”.

Ĝis nun, la organizantoj diras, ke nek la polico nek la ŝtatprokuroro oficiale komunikis kun ili por konfirmi la jurajn kialojn de la malpermeso de la kongreso.

“Tiu konduto estas kontraŭleĝa,” diris Nadija Samour,  germana-palestina advokato kiu procesis kontraŭ la germana federacia registaro pro tio, ke ĝi helpas kaj instigas la militon en Gazao.

“Ili ne povis anticipe malpermesi la eventon ĉar ni obeis ĉiujn jurajn procedurojn kaj kunhavigis la liston de la prelegantoj kun ili. Se ili provus malpermesi ĝin antaŭe ol ĝia okazo, estus eble procesi”.

La organizantoj nun serĉas jurajn rimedojn por kontesti la decidon malpermesi la eventon.

Sabaton la 13-an de aprilo, la palestina kongreso kunvenigis manifestacion por protesti kontraŭ la malpermeso. Almenaŭ 2000 homoj akceptis la inviton. “Ili volis malpermesi al kelkaj centoj da homoj ĉeesti la eventon kaj rezultis, ke miloj manifestaciis surstrate”, diris unu manifestacianto, kiu volas resti anonima.

Dimanĉon, la 14-an de aprilo, la kongreso decidis denove provi kaj disaŭdigis per rekta elsendo siajn kunsidojn kun jura aŭtoritatulo Noura Erekat, Jamila Hamadaqa kaj germana-palestina aktivulo Abdallah Abdelhadi. Pro tio, ke ĝis nun la evento ne estas “oficiale” malpermesita, la organizantoj provas kompreni ĝis kioma nivelo la ŝtato iros por provi silentigi ilin.

La eventoj de la pasinta semajnfino ŝajnas iri kontraŭ la kreskanta sento en la germana popolo, kiu oponas la militon en Gazao ĉar fakte, laŭ lastatempa opinisondo,  69 elcentoj de la germana loĝantaro opinias, ke la israela milito ne estas pravigita. Sed la statistikoj de opinisondoj malofte tradukiĝas en realaj faktoj sur la tereno. Tio, laŭ ĉeestantoj de la kongreso, devas ŝanĝiĝi.

Post la publikigo en sia blogo de la prelego kiun li devis fari en la kongreso, la greka ekonomikisto kaj kunfondinto de diem25 Yanis Varoufakis estis informita de la germana Ministro pri internaj aferoj, ke estis malpermesite al li eniri Germanion aŭ prelegi al la germana loĝantaro ĉeeste aŭ rete. Pri tio sabaton la 13-an de aprilo li direktis sin al la germana publiko pepante per Tvitero:

“Tio mortsonoras la perspektivojn de Federacia Respubliko Germanio” diris li. “Rigardu la tekston de la prelego kaj diru al mi ĉu mi malpravas”.