Prenante la buson Nagasaki Keni al la duoninsulo Shimabara. Foto de Nevin Thompson.

[Ndlr: Tiu ĉi artikolo estis originale publikigita la 10-an de novembro 2017.]

Tamura Kenichi faris nekredeblan atingon: li vojaĝis de unu landfino de Japanio al la alia per loka buso.

Krome, sub la uzantonomo OleOleSaggy, li afiŝis filmetojn pri sia vojaĝo (entute 220 filmetojn) al Jutubo kiel ludlisto.

La unua videaĵo en la serio komenciĝas proksime de Wakkanai, la plej norda setlejo de Japanio. La vojaĝo pluiras per buso laŭ la malproksima marbordo de la Oĥotska Maro [eo], pasante tra iuj el la plej spektaklaj pejzaĝoj en Japanio. Ne ĉio el la pli ol 11-hora vojaĝo estas dokumentita en la videaĵo, sed ĝi estas bonega maniero esplori Japanion.

Post tri jaroj kaj pli ol 200 videaĵoj, OleOleSaggy finas sian vojaĝon ĉe la fervoja stacio de Kagoŝima, distanco, depende de la elektita itinero, de almenaŭ 2600 kilometroj. Vi povas vidi la tutan vojaĝon ĉi tie.

Laŭ la priskribo en la ludlisto, OleOleSaggy ankoraŭ ne tute finis la projekton, kaj planas vojaĝi kaj dokumenti pli detale plurajn busitinerojn, same kiel iutage vojaĝi per buso tra la Okinava insulo [eo] por fini la serion.

La videaĵoj de OleOleSaggy estas parto de ĝenro aŭ subkulturo de Jutubo nomata “antaŭa vido” (japane 前面展望, elp. zenmen tenbo), kie trajn- aŭ busentuziasmuloj registras kaj alŝutas videaĵojn de trajn- kaj busitineroj ĉie en Japanio.

En alia videaĵo, Olelesaggy veturas per buso el la kastelurbo Kanazawa ĉe la Japana Maro [eo] supren laŭ la okcidenta marbordo de la sovaĝa kaj malproksima Duoninsulo Noto, vojaĝo de ĉirkaŭ 100 kilometroj.

Dum la buso vojaĝas tra kelkaj el la plej izolitaj urboj ĉe la marbordo, je la fino de la videaĵo, surbaze de la varma kaj vigla konversacio, evidentiĝas, ke la busŝoforo estas sufiĉe amika kun la pasaĝeroj en la buso, [tio estas] lokuloj kiuj fidas je la transporta servo por moviĝi en ĉi tiu kampara areo.

La jutuba kanalo de OleOleSaggy prezentas dekduojn da ludlistoj kaj centojn da videaĵoj pri “antaŭvidaj” bus- kaj trajnvojaĝoj tra Japanio [tio estas kun senbara elvido tra la antaŭa glaco]. Li ankaŭ havas Fejsbuk-paĝon, Tviter- konton kaj ankaŭ apartan Jutub-kanalon preskaŭ tute dediĉita al la rekreado de “ekiben” [tio estas la skatoletaj tagmanĝoj kun lokaj bongustaĵoj venditaj en preskaŭ ĉiu grava stacidomo tra Japanio] en sia kuirejo hejme.